عاشق صبيا



 
الرئيسيةاليوميةس .و .جبحـثالأعضاءالمجموعاتالتسجيلدخول
Cool Yellow 
Pointer Glitter

شاطر | 
 

 أرجوك لوتسمح تراك بدنيتي منفي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابوناصر
عضو ذهبي
عضو ذهبي
avatar

عدد المساهمات : 157
تاريخ التسجيل : 05/01/2011
الموقع : احبك موووت

مُساهمةموضوع: أرجوك لوتسمح تراك بدنيتي منفي   الأربعاء يناير 19, 2011 2:49 pm

خلاص ~أرجوك لوتسمح تراك بدنيتي منفي

بقلم : العين غرآمي



[ البـــارت _1_ ]

الجسد موجود والروح أرحلت !!
والزمن غدار لكني صبور ..
عيني الي من عنا الوقت ادمعت ..
حزنها ياخوي شيد له جسور ..
وحدي بدنيا بها روحي اطلعت ..
فاقد الاحساس ماعنده شعور !
الهوى مابيه انا روحي اشبعت ..
وش يفيد الجرح لو كلي كسور ؟

ظلام الغرفه يحوم حواليها ، تناظر عيونها سما دارها والضباب من دمعها يتكاثف !! بالها شارد !! تتذكر كل مامر بحياتها من حزن !!

تتذكر كل لحظه مرت عليها من وصلها خبر الحادث اللي تعرض له أخوها وولد عمتها ، الحادث اللي دمر الحديد ، ورمى جسد ذابل في طيات أجهزة العناية المركزة!!

الريم توها بعمر الزهور !! انسانه هاديه ، ما تحب تختلط بالناس وايد ، قلبها طيب ، وايد متعلقه بأخوها حمدان اللي يكبرها بثلاث سنين !!

قعدت الريم تفكر بأخوها وتدعي الله إنه يشفيه هو وولد عمتها اللي كان كل شي بحياتها !!
دموع عينها ذرافه ع خدها ، وعيونها تحيط بها السواد !! تردد بصوتها المبحوح وهي تناظر صورة اخوها :

عيني اللي من عنآ الوقت إدمعت !!
حزنها يا خوي شيد له جسور !!
عيني اللي من عنآ الوقت إدمعت !!
حزنها يا خوي شيد له جسور !!

وفجأه سكتت وردت تصيح بحراره ، تحس بحرقه ع خدودها من زود حزنها ، !!
يندق باب غرفتها ، أمها تنادي: الريم .. الريم يابنيتي فجي البآب .الريم!!

ولكن الريم عيت انها ترد من زود حزنها ، تحس ان الحروف تجمدت والسكون خيم عليها!!
تحاول تنطق لو بحرف !! تحاول انها تنش تفج الباب لأمها لكن دون جدوى !!

أم الريم خافت ع بنتها ! تمت تصيح وهي تزقر ولدها فلاح اللي يتولى ادارة شركة المرحوم أبوه !!
فلاح سمع صوت امه وهي تنادي ، فتح باب الغرفة وربع صوبها ودقات قلبه متسارعه !!

خير يا إميه عسى ماشر !!بلاج يا اميه ؟؟ ام فلاح بصوتها المتقطع لي يمليه الحزن : يآ ولديه ختك الريم من يوم ما سمعت بخبر الحادث وهي قافلة ع عمرها الباب !! صار لها يومين ما طاحت اللقمه حلجها !! يا أبويه شوف ختك لا تروح من بين يدينا،واعليه عليج يابنيتي وواعليه ع ولديه لي بين الحيا والموت . وردت أم فلاح تصيح .

فلاح : خلاص يا إميه لا تتعبين روحج ،انشالله حمدان بيقوم بالسلامه واذا على الريم خليها عليه ، أنا احين بسير لها ،بس انتي ارتاحي ، فلاح يقرب من أمه يمسح دموعها بحنان ،
وباسها ع خدها وروح .

وهو يركب الدري زقرته امه : فلاح !! رد عليها بابتسامه عذبه : لبيه يانور الأعيان .
أم فلاح مبتسمه :ربي يحفظكم لي ياعيالي . ابتسم فلاح وكمل طريجه.

عند باب غرفة الريم، فلاح يدق الباب بشويش : الريم ، الريم حبيبتي فجي الباب؟
ولكن الريم ماترد ، فلاح خاف على اخته ، تم يدق ويدق ، آخرتها يئس وطفح الكيل ، مالقى غير انه يحاول يكسر الباب ، أول ما تبطل الباب طاحت عينه على اخته اللي طايحه ع الأرض ، خصلات شعرها الناعم اللي بسواد اليمر ، طايحها ع ويهها ، والدموع عخدودها متناثره ،

ربع فلاح صوبها ، وخوفه على اخته يتزايد : الريم ، الريم حبيبتي نشي،شصارلج ؟ يهزها ولكن دون حراك !! مسح بيده ع خدها وهمس بنعومه ، الريم !! نشي دخيلج !!

ربع صوب غرفته خذا سويج سيارته ، ورد لاخته شلها فحضنه ودقات قلبه تتزايد ، وهو نازل من عالدري امه نشت تربع صوبه : بنيتي الريم.. فلاح بلاها ختك بلاها !!

فلاح رد بسرعه : إميه يلا لبسي عباتج وانا اترياج فالسياره ، دخيلج لا تتأخرين .
أم فلاح : انشالله.. انشالله ياولدي ، خذت أم فلاح عباتها وراحو بسرعه المستشفى .


[ مستشفى توام ]

فلاح : ها دكتور ، طمنا دخيلك ع ختيه شو فيها !!
الدكتور : والله يا ابني البنت دمها نازل آوي ، والواضح انهاا متضايقه من حاجه تعباها .
فلاح : هيه نعم يا دكتور ، دخلت أخوها المستشفى وايد أثرت فيها ، صارلها يومين هب راضيه تاكل .
الدكتور : أيوا بس دي حاجه بتأثر عليها كتير ، وخاصتن إنها مصابه بالأنيميا !
أنا إديتها شوية مقويات ، والمطلوب منكم انكو تهتمو فيها أكتر وما تزعلوها ، ومشافايه ان شاء الله والحمدلله ع سلامتها .
فلاح : الله يسلمك يا دكتور ، وامرره لا توصي ، الريم بعيوني ،امممـ أقدر أشوفها احين ؟
الدكتور : أكيد تقدر تشوفها بس ما تزعلوهاش.
فلاح : ان شاء الله يا دكتور ، فداعة الله .
الدكتور مبتسم : مع ألف سلامه .


راح فلاح وأمه يشوفون الريم ويتطمنون عليها ، دخلت أم فلاح وبسرعه صوب بنتها وهيه تحضنها وتصيح : الحمدلله ع سلامتج يابنيتي ما تشوفين شر انشالله .
الريم : الله يسلمج يا إميه ، انا بخير لا تحاتين .
فلاح : سلامات دلع .
الريم : احم احم اسمي الريم لازم بتدلع ، الله يسلمك يالداادووه [ الدبدوب ] .
فلاح وهو يأشر على أمه : دام هالزين أمج من وين ثرج بتيبينها الخقه . ونقع ضحك
أم فلاح تضربه بشويش ع جتفه : وياويهك الهرم ، أحينه انا خقاقه سواد ويهك .
فلآح : إلا شيختهم وربي .
ريمووه نقعت ضحك ع شكل امها وهي تسمعه وع ملاقة أخوها .
أم فلاح يونه زعلانه منه : روح روح هب منك تراه .
فلاح : فديت الزعلانين وربي ، ويطالع الريم ويكمل : ثره حتى الدلع من هالزين .
أم فلاح والريم يلسو يضحكون ع حركاته المليقه .

فلاح يرمس الريم : ها الريم ظنتي سمعتي شو قالج الدكتور ، لا تضيجين بعمرج وتغذي عدل واهتمي بعمرج .
الريم : انشالله يدي .
فلاح: يدووج خلال قولي آمين .
الريم : ههه ياحظهم دامنيه انا خلالهم ، غرام هاا .

فلاح يطالعها بغباء واونه سوالها طاف يرمس أمه : إميه عنديه لج بشاره . ويطالع الريم .
الريم تطالعه بشغف وجنها تقول له يلا ارمس غصصتبيه . ههه
أم فلاح : بشرني يا بوك من متى ما سمعناها البشاره .

فلاح يطالع الريم وهو يضحك ويرمس أمه : فديتج يالغاليه ، تعالي برع بخبرج .
الريم تصرخ بدلع : فلااااحووووه يالداادووه حرام عليك يلا قول .
فلاح : انزين انتي يالدلع بلاج اشتطيتي انا مارمستج .
الريم تضحك : ههه مادري بس أحس انه عن حمداني .
فلاح : فديت هالطاري والله ، هيه نعم عن حمدان ، ويطالع أمه : إميه حمدان ظهر من العنايه الحمدلله ، وجان تبين احين بنسير له ، بس هو راقد أحين .
ام فلاح ودمعتها ع خدها : بشرك ربيه بالينه يا ولديه ، لالا أبوويه بسيرله حتى لو راقد ، واعليه عليه مايسوى علينا هالحديد غربلاته . وتحرك يدينها يمين ويسار .
الريم وهي تقلد امها تلوح بيدها يمين ويسار : هيه والله مايسوى ، يلا يلا سرنا عنده .
فلاح ويعيد الحركه ويتمايع فالرمسه يقلدها : لا الشيخه الريم ، ماشي سيره دواج .
الريم : ماماتي قوليله بصيح .
أم فلاح : لا يا بنيتي ، انتي نشي بالسلامه وبتسيرين له ، وين تبين انتي وعصاقيلج بتنشين وبتطيحين علينا ، أحين بنييبلج شي تاكلينه وعقب برويحاتيه بوديج .
الريم وهي ماده البوز : ان شاء الله .
فلاح : رووووووح يالذراابه .
الريم صخت عنه محررجه .
أم فلاح : ما قلتلي يا وليدي وشحاله ولد عمتك ؟
فلاح : والله يا إميه بعده فالعنايه .
أم فلاح ربيه يشفيه ان شاء الله .
الريم تطالعهم وهي ساكته ، تحاول تخفي دموع تيمعت فعينها .

فلاح : يلا الريم نحن سايرين شي فخاطرج ؟؟.
الريم تهز راسها لانها هب قادره ترمس بمعنى لا .
أم فلاح : يلا عيل يا بنيتي بنيج عقب .

ظهروا عن الريم ، ومجرد ما ظهروا انهارت الريم بصياحها اللي ماقدرت تكتمه .


أم فلاح وولدها وهم ظاهرين تلاقو ويا عمتهم أم غيث وريلها بوغيث ، وبنتهم أسما اللي عمرها 18 سنه وهي كبر الريم وتوأم روحها ، و ولدههم غيث ربيع فلاح الروح بالروح ، غيث وفلاح بنفس العمر ، 25 سنه ، لكنهم معندين ومايبون يعرسون . وكل ماحد رمسهم قالو العمر جدامنا
الشباب سلمو ع بعض ،أم فلاح تسلم على أم غيث: مرحبا مرحبا يأ أم غيث ،
شحالج ربج إلا بخير .

أم غيث : مرحبابج زود يالغاليه ، الحمدلله ماشكي باس ومن جداج ؟
أم فلاح : والله نحمدلله على كل حال .
أم غيث :الحمدلله ع كل حال .
فلاح يسلم على عمته : شحالج عمتيه عساج بخير ؟
أم غيث : الحمدلله يابويه ، انت شحالك ؟
فلاح : أحمد الله .
غيث عقب ما سلم : خطفتو ع حمدان و هادف ؟
فلاح : لا والله احين سايرين صوبهم ، وكنا صوب ختيه هني بعد تعبانه ،طاحت علينا .
أم غيث : واعليه عليها ، بلاها الريم ؟
أم فلاح : شقولج ياوخيتي من طاح أخووها لا تاكل ولا شياته ، ودق بها العوق.
ام غيث: لا حول ولا قوة إلا بالله ، خطاها الشر .
أم فلاح : خطاج اللاش .
فلاح : ها العيايز مطولين يلا بنسير .
غيث يضحك : لا ابوويه هاييل محد يسويلهن سبب ، واحين بيسيرن هناك يباغمن ههه .
أم فلاح : عيز حيلك انت وياه ، يلا أشوف امشو وانتوو ساكتين .
غيث: آآخ فلاح ويهك ما عورك .
فلاح حاط ايده ع خده : إلا ما عورني هههههه .

أم فلاح وأم غيث يهزن روسهن ، ويحمدن ربهن ع نعمة العقل .

غرفة حمدان ( مستشفى توام )

حمدان توه يبطل عيونه .. يشوف الدنيا من حوله وحاس بصداع ...يتذكر اللحظات السريعه اللي وصلتهم لهالحال ،

كانو سايرين هو وولد عمته هادف بوظبي ، يحظرون مباراة العين ، وحفزانين بالقو ، مبطلين الجامات ، وصوت الأغاني تشل الامارات شل ، كانو يسمعون أغنية [ يا عاذلي ] :


يا عاذلي مالك ومالي وش لك بقلبي دام هو حب
عيناوي هب في العين غالي إلا بوسط العين والقلب
في خافقي له قدر عالي والحب ذا نعمة من الرب
والعين من أول و تالي عشقي وأنا اللي فيه معجب
عيناوي هو سعدي وفالي للسعد صار بدنيتي درب
كالحلم ساكن في خيالي معاه حققته ولو صعب
يا عاذلي جاوب سؤالي إن كان تعرف قيمة الحب
عمرك سمعت أن الليالي إن يت بعشقٍ تشاور الصب


حمدان داش فيلنج ويا الاغنيه ويغني ، وهادف إيبس ، عايشين الجوو .
وفجأه تظهرلهم شاحنه ، وتوديهم عالم اللآوعي !!


حمدان وهو يتنهد ويقول فباله : آآآخ والله ما بسامح عمريه لو استوى لهادف شي !! أنا السبب أنا السبب !! انا لي كنت أسووق ، ولو كنت منتبه ع الطريج ماكان صار اللي صار !!
وضرب بإيده ع الطاوله بقو !! وحس بألم كبير !!
يندق باب غرفته وتدخل أمه وعمته وفلاح وغيث وأسما!! حمدان أول ما شاف أمه دمعت عينه ونزل راسه !! يت أمه صوبه وخانتها دموعها : الحمدلله ع سلامتك يا وليدي ، ماتشوف شر يا غلا أمك !!
حمدان مسح دموع أمه : سامحيني يا إميه سامحيني !! عذبتج ويايه ،، سامحيني وباسها ع يدينها !!
أم فلاح : انت ظنايه يا حمدان ، وامرره مابغيك تفكر بشي أحينه ، نبغيك سالم ياوليدي انت وولد عمتك !!

حمدان كان يحب ولد عمته أسما ، اللي ما كانت تبادله أي مشاعر حب !!
أول ما دخلو تحرى أسما الريم لأنهم نفس الطول والجسم تقريبن ، كانت متغشيه ، فقال لها ها الريم ما بتسلمين عليه .؟

أسما منحرجه : الحمدلله ع سلامتك الشيخ .
انتبه حمدان انها هب الريم : وعرف انها أسما ، جان ينشق الحلج ، وبنفس الوقت تضايج لانها قالتله الشيخ ومازقرته باسمه ، فقال : اوه سمحيليه تحريتج الريم!! الله يسلمج يارب ,
أسما : ما عليه الشيخ بالحل .
حمدان فخاطره وهو محرج: يلعن يومه شيخج .

الكل سلم على حمدان وتحمد له ع السلامه !! وظهروا صوب هادف ، وتم فلاح شوي عند حمدان .


حمدان يطالع أخوه فلاح : شخبار هادف ؟
فلاح مبتسم : الحمدلله ، ربي يشفيكم انشالله يميع .
حمدان وهو يحاتي ولد عمته وتوأم روحه : نقلوه غرفته ؟
فلاح : لا يا أخوي ، هادف بعده فالعنايه !!
حمدان : آآخ كله مني انا السبب !!
فلاح : حمدان لا تقول جذا ، كل اللي صار مقدر من ربك !! ونحن ياما قلنالكم ودروا عنكم هالطيش لكن انتو الله يهديكم ما تسمعونها الرمسه!!
حمدان تم ساكت وهو يطالع الأرض ، متحسف ع كل شي ، يدعي ربه انه يشفي ولد عمته .
ورد يرمس اخوه : وين الريم عيل ؟
فلاح ارتبك : اممممـ والله الريم موجوده .
حمدان : عيل شعنه مايت وياكم اكيد زعلانه منيه ، عاد منو يراضيها دلع .
فلاح متردد : حمدان الريم هني فالمستشفى مرقده.
حمدان : شوووووووووووه ؟
فلاح بهدوء : حمداني الريم بخير لا تخاف بس لأنها كانت تحاتيك وماتهتم بعمرها ونزل عندها الدم ، والدكتور طمنا قال باجر انشالله بيرخصها، بس بيخليها اليوم عسب يراقبون صحتها .
حمدان متضايج من عمره : يلا الحمدلله .
فلاح ترخص من اخوه وسار يشوف ولد عمته ، وعقبها شل هله ووداهم البيت .

بنفس اليوم [ عقب صلاة العشا ] غرفة الريم

الريم تدوور فحجرتها تحاتي أخوها وولد عمتها ، تبا تسير عندهم ، تبا تطمن على أخوها وولد عمتها اللي لي أحين فالعنايه ، دمعت عينها وقالت انا لازم اروح احين ,
لبست شيلتها وعباتها ، تغشت وسارت الرسيبشن ، تخبرت عن غرفة أخوها وسارت صوبه .

دقت الريم الباب بشويش ، حمدان : إقـــــرب !!
الريم تفج الباب وتطالع اخوها بابتسامه عذبه : جـــــريب .
حمدان : مرحبا والله بشيخة الحريم ، مرحبا بدلع ,
الريم : فديت شيخ الغراشيب أنا .
قربت صوب أخوها وايهته ، وعقب يلست حذاله ميوده يدينه ، وقالتله بدلع : جيه تخليني احاتيك يالدرام !
حمدان : فديت خشمج انا أ... !!
وقبل لا يكمل تقاطعه الريم : حووووه انت لا تتفدا خشمي بس.. الاسلام نص ع المساواه ، تفداني كلي ، وضحكت بدلع .
حمدان : فديت هالضحكه يا ربـ.... !!
تقاطعه مره ثانيه : حووه انت يا خشميه يا ضحكتيه انت ما تفهم ههههه .
حمدان : صدق دلع انتي ، فديييييييييييييييت كلج انا .
الريم : هيه توووك ، يلا أحين كمل ، راضني .
حمدان : أسميج ، مابغي هب مراضنج ,
الريم : يالدااااااااااادووووووووه ماحبك .
حمداان يطالعها بنذاله : حلفي
الريم : مليييييييييييييق .

حمدان تم يضحك ع اخته وسوالفها ، حمدان وايد يحب اخته الريم ، وهي وايد متعلقه فيه ، وأما عن دلعها وحركاتها الطفوووليه فلا تعليق ،وتمو يسولفون ، عقب قالتله يلا عيل انا بترخص ، شكلي غلط فقسم الرياييل !
حمدان : انتي بكبرج غلط خخخخ .
قالتله : دادووووووووووووووووووه
قالها : عصاااااااقيل .

وتمو يضحكون ، عقب ظهرت عنه وفدربها يلست تفكر بهادف ، آآآآخ شكثر متولهه عليك ، ربيه يشفيك ويردك لهلك بالسلامه ، وكان خاطرها تسير له بس استحت لان من عاداتهم فالعايله ان البنات منقود يشوفن عيال عمامهم وعماتهم .

يوم وصلت عند باب حجرتها ما طاوعها قلبها ، وحست بنغزه ، دمعت عينها وأصرت تسير صوبه ، حتى لو تشوفه من بعيد ، وصلت صوب العنااية المركزه , طلت من الجامه عليه، دمعت عينه وهي تشوف ولد عمتها القوي بهالحال ، فجأه شافته من بعيد وكأنه يتنفس بالقو !! خافت عليه !! ربعت صووب النيرس تزقرها ، يو الدكاتره يتراكضون ، دخلو عنده !! شافو انه عنده ضيج بالنفس وهب قادر يتنفس !!حاولوو ينقذوونه !! والريم مترووعه تصيح بحراره ، وتدعي الله ان يشفيه !!



ليت الوجع بعروق قلبي ولا فيك !!
وليت التعب غلطان سآهي ولا جاك !!

لو الشفآ بضلوع صدري لدآويك !!
وأطحن ضلوع صدري فدآيآك !!

الله من شر المقادير يحميـــك !!
والله يحفظك يا حبيبي ويخليك !!


البـــارت _ 2 _

يوم وصلت عند باب حجرتها ما طاوعها قلبها ، وحست بنغزه ، دمعت عينها وأصرت تسير صوبه ، حتى لو تشوفه من بعيد ، وصلت صوب العنااية المركزه , طلت من الجامه عليه، دمعت عينه وهي تشوف ولد عمتها القوي بهالحال ، فجأه شافته من بعيد وكأنه يتنفس بالقو !! خافت عليه !! ربعت صووب النيرس تزقرها ، يو الدكاتره يتراكضون ، دخلو عنده !! شافو انه عنده ضيج بالنفس وهب قادر يتنفس !!حاولوو ينقذوونه !! والريم مترووعه تصيح بحراره ، وتدعي الله ان يشفيه !!

ليت الوجع بعروق قلبي ولا فيك !!
وليت التعب غلطان سآهي ولا جاك !!

لو الشفآ بضلوع صدري لدآويك !!
وأطحن ضلوع صدري فدآيآك !!

الله من شر المقادير يحميـــك !!
والله يحفظك يا حبيبي ويخليك !!

الكون شاحب .. دامس .. يدور بها .. تشوف الكل بحركه سريعه .. الضباب من حواليها .. الدموع غطت معالمها !! تشوف ولد عمتها وغلا قلبها بين الحيا والموت .. هب عارفه شتسوي .. وبدون سابق انذار طاحت الريم ع الأرض .. النيرس شافتها وربعت تزقر الدكتور .. يو وشلوها ودخلوها غرفتها .. شافوا ان أعصابها حيل تعبانه !! والدم نازل عندها .. ركبولها مغذي .. وخلوها ترتاح .

[العنايــة المركزه ]

الدكتور يلقي الأوامر . الكل يتحرك بسرعه .. يحاولون يردون النفس الطبيعي لهادف ..
النيرس وهي خايفه : دكتور دقات قلبه بدت تتناقص .
الدكتور طالعها وسكت .. أشر ع جهاز الصعقات الكهربائيه عسب يحاولون يردون النبض ..
هادف مابين الحيا والموت .. يصحى ويرد يفقد وعيه .. وكل مره ييلس يتذكر كل مامر بحياته .. من لحظات حلوه .. من حزن .. من فرح .. يتذكر ولد خاله حمداني .. يتذكر خبالهم وربشتهم .. يتذكر الريم .. ويحس بألم كبير .. عيونه دمعت ورد فقد الوعي .. والدكاتره على حالهم يحاولون ينقذونه ..

[ بيت بو غيث ]

بو غيث : يا أم فلاح هدي .. شو ياج . انشالله الولد مافيه شي ..
ام غيث وهي تصيح : يا بوغيث هذا ضنايه .. ماصبر عنه ..
بوغيث : يا ام غيث انشالله ماعليه شر .. دحري الشيطان وحطي الرحمن فصدرج .. قومي صلي لج ركعتين وادعي ربج إنه يكون بخير .. والرب يشفيه .. ترى الدموع ما تحيي ميت ..
أم غيث : انشالله يا يوغيث انشالله ..
بوغيث باسها ع راسها : يلا الغلا نشي بارك الله فيج .
أم غيث ابتسمت والدمع ع خدها ونشت تصلي لها ركعتين وتدعي الله .. وبو غيث وياها ..

يوم الخميس [ غرفة الريم ] مستشفى توام

بطلت الريم عيونها .. تحس راسها يدور .. تحس بتعب هاد حيلها .. تتلفت يمين يسار .. تحاول تتذكر شو استوى .. شافت المغذي ع يدينها .. حطت يدينها ع راسها لانها كانت حاسه بألم كبير .. يندق باب غرفتها ..
الريم : تفضـــل ,.
يدخل الدكتور ووياه النيرس مبتسمين : صبــاح الخير ..
الريم : مرحبا .. صباح النــور ..
الدكتور : إزي صحتك اليوم .؟
الريم : الحمدلله دكتور ..
الدكتور : الحمدلله .. يا بنتي يا ريم انتي عندك أنيميا .. وانت دي الحاجه عرفاها .. فمن المفروض انك تهتمي بصحتك .. وتتغزي .. إتفقنا ؟
الريم مبتسمه : إتفقنا .. انشالله دكتور .
الدكتور يبادلها الابتسامه : دي الوقت هيجيبولك الفطور .. لازم تفطري .. وبعد كده تاخذي الدوا .. على اساس ترجعي اللي فقدتيه ..
الريم : انشالله
الدكتور: طيب انا رايح .. عاوزه حاجه ..؟؟
الريم : امرره ياغير سلامة راسك ..
الدكتور : الله يسلمك .. ومعافايه ..
الدكتور وهو طالع . الريم تذكرت هادف .. صرخت .. :دكتوووور ...
الدكتور تروع صد صوبها : خير في إيه يا بنت .. ؟؟
الريم وفيها ضحكه ع خبالها وع شكل الدكتور وهو متروع : إسـ إسمحلي دكتور روعتك ؟
الدكتور : إيه ؟ روعتيني ؟ هي روعتك دي بتطلع إيه ؟
الريم فخاطرها لحول ابتلشت : دكتور يعني خوفتك خوفتك ..
الدكتور : أيوا خوفتك .. دنتو عندكو قاموس عجيب غريب ..
الريم : امرره فالك طيب تبغيني أعلمك ..؟؟
الدكتور : لالا شكرا .. طيب يا روعتك .. كنتي عاوزه إيه ..؟
الريم تضحك : هههههههه دكتور احم احم .. ماشي بس كنت بتخبرك عن ولد عمتيه هادف .؟ شو صحته؟
الدكتور: ما تخافيش يا الريم .. الدكتور عمار عمل اللي عليه .. والحمدلله هادف تعدى مرحلة الخطر .
الريم نقزت : احححححححححححلف .؟
الدكتور ربع صوب الباب : إيه إيه ؟ حصل إيه ؟
الريم ناقعه ضحك ع شكل الدكتور : آفسه .. أوه أقصد آسفه .. لا تلومني من الوناسه ..
الدكتور : يا ريم عندكو مثل هنا بيقول العقل زينه .
الريم بعبط : شو يعني ؟
الدكتور ما يعنيش حاجه ههه .. أنا طالع ..
الريم تمت فاجه حلجها والدكتور هز راسه .. ابتسم وظهر ..
الريم : العقل زينه .. فجأه نقزت .. توها مستوعبه .. عنلاااااااتك توني فهمت انا مينونه .. وتمت تضحك .. صدق خبله ..ههه

شوي إلا أمها وعمتها يايين .. دخلو سلمو عليها ..
الريم : مآآمآآيه ولهت ع البيت .. متى بيرخصونيه .؟
أم فلاح : لو الشور شوريه ما خليهم يرخصونج .. بخليج تخيسين هني .
الريم مبوزه وبدلع : مآمآيه حنااام .. ليش هالحقد ..
أم فلاح تضربها بشويش : حقد ها .. سواد ويهج يالهرمه ..
الريم تضحك : هههه فديت روحج .. فهمت فهمت ..انشالله بهتم بعمريه .. بس انتي خليهم يفكونا من هالصندقه .
أم غيث : وي يا بنيتي أي صندقه ؟
الريم : ههه عمتيه أقصد هالحجيره .. لا حس ولا خبر .. أبغي اكون حره ..
أم غيث : هييه .. والله يابنيتي ادريبها يلسة المستشفيات ما تنطاق .. ياغير شو بتسوين صبري ..
الريم تغني : لي سنتين أنا صابر قالولي بيجي باجر ..
أم فلاح : وي دي .. منو ها لي بيي باجر .. سود الله ويهج ..
الريم ناقعه ضحك :هههههههه امييه امييه هاي اغنيه .. يغنيها الجسمي .. وحليل حالاته متعذب ..
أم فلاح : منو ها بعد ؟ من وين تعرفينه ؟؟..
أم غيث تضحك : يا أم فلاح ها واحد يغني فالصندوق الأسود عندنا اسمه الجسمي ..
الريم : نعم نعم ؟ شسمه ؟ منو الصندوق الاسود هههههه
أم غيث : هذا التيلفزون ..
الريم ناقعه من الضحك : التلفزيون الله يهديج .. اونه الصندوق الاسود ههههه
ام فلاح : انزين الريم ولا قلتيلي متعذب .. جيه بلاه وحليله ؟
الريم : هيييييها يا اميه ثرج ماتعرفين شو ياه ..
أم فلاح : شو ياه يا بنيتي؟؟ .. خبريني .
الريم : هذا طولي بعمرج متعذب ..
أم فلاح : هاي عرفناها بس ليش ؟
الريم : انا بخبرج .. هذا متعذب ..
أم فلاح : عشان ؟
الريم تطفر بأمها وتحرك حياتها فوق وتحت : متعذب .
أم فلاح حرجت : يلا قولي سميتينا .
الريم تضحك : هههه صدق عيوز .
أم فلاح : عيز حيلج يالهرمه .. انا براويج .. صبري صبري ..


وتدق حق فلاح : مرحبا فلاح .
فلاح : مراحب الغاليه شحالج ؟؟
أم فلاح : جانك تبا حاليه .. تراني مستمه ,, وهب بخير .
فلاح : خير يا اميه شصاير ؟
أم فلاح : منو غيرها هاليعريه الريم .. والريم ناقعه ضحك ..
فلاح : اليعريه مره وحده .. ههه بلاها ؟
ام فلاح : يوونه تعرفلي واحد اسمه الجسمي ، يطلع فالصندوق الاسوود .
فلاح ناااقع ضحك وهب قادر يرمس .

أم فلاح : بلاك انت بعد .. عن تنطر من ضحكك .
فلاح : لا مابنطر .. ولا تعرف الجسمي ها ..
أم فلاح : هي يا وليدي .. يبالها أدب ..
فلاح : نعم يبالها .. عيل شو تبابه الريال تطالعه فالصندوق الاسود .
أم فلاح : لا وتقول انه متعذب .
فلاح : هههههه مسكين حاله .. صدق متعذب .
أم فلاح مصدقه : وي دي .. حتى انت دريت بسالفته انه متعذب ؟
فلاح يضحك : هههههه هيه دريت ..
أم فلاح : خبرني يابوك بلاه .. وحليله غمضنيه ..
فلاح : متعذب ..
أم فلاح : انزين من شوه .. شو صابه ..؟؟
فلاح : متعذب ..
الريم وام غيث ناقعين ضحك ..

أم فلاح : سود الله ويهك انت وختك .. يلا فارج ..
فلاح يضحك : سيري سئلي حمدان ..
ام فلاح : سير سير عني .. مالت ع ويهك انت وختك ..
فلاح : فديت خشمج انا ..هاتي أحبه ..
أم فلاح مستحيه : يلا يلا فداعة الرب..
فلاح يضحك : الرب حافظ ..

أم فلاح تطالع الريم ومتغصصه منها .. الريم كاااااااااااااااااااك << تضحك

أم فلاح : يالله بعقل .. وترمس أم غيث : قومي يا وخيتي سرنا صوب العيال.. أخاف استخف انا ان يلست عند راعية الصندوق الاسود .
أم غيث تضحك : يلا يا أم فلاح .
الريم : ماماتي بيي وياكم .
أم فلاح : صكيها الدعنه ..
الريم يونه زعلانه : انشالله ..

وروحن الحريم صوب عيالهن ..

[ غرفة حمدان ] مستشفى توام

ام فلاح وام غيث: السلام عليكم
حمدان : وعليكم السلام ورحمة الله .. مرحبا ملايين ..
ام فلاح : الله يرحب بك عفضله ..شحالك غناتي عساك أخير ؟
حمدان : الحمدلله اميه .. انتي شحالج؟
ام فلاح :الحمدلله يابوك ..
حمدان : شحالج عمتيه؟؟ ..
أم غيث: يسرك حاليه ياوليدي .. شو صحتك؟
حمدان : ترتوووب

أم فلاح : يابوك متى بيرخصونك .. ماقالولك ؟
حمدان : لا يا اميه ماقالو .. بس الدكتور قال صحتك طيبه .. انشالله جريب بنرخصك.
أم فلاح : انشالله ..

شوي إلا والدكتور داخل ..

الدكتور : السلام عليكو ..
الكل : وعيكم السلام ورحمة الله
الدكتور : كيف حالك يا حمدان ؟؟..
حمدان : الحمدلله دكتور ..
الدكتور : عاوز تطلع .؟
حمدان : آآخ يا ليت والله ههه
الدكتور مبتسم : عاوز تتخلص مننا .. الله يسامحك
حمدان : لا والله يادكتور .. ووقفتك مابنساها .. أفا عليك بزورك .. بس انت أدرى بيلسة المستشفيات..
الدكتور : ده واجبنا يا ولدي يا حمدان ..وهتخرج النهار ده
حمدان : تسلم يادكتور
الدكتور : اممممـ نسيت أخبركوو ...
حمدان : تفضل يا دكتور ..
الدكتور : انا جاي ابشركو .. إن صاحبك هادف ..خرج من العنايه النهار ده ..
حمدان طاير من الوناسه : بشرررك ربي بالينه ..

أم غيث دمعت عينها : تسلم يادكتور .. نقدر نشوفه ..؟؟
الدكتور : اكيد تقدروا تشوفوه .. طيب انا طالع .. عاوزين حاجه ..؟
حمدان : سلامة راسك الشيخ .. ومن جدانا ..؟؟
الدكتور : الله يسلمك..هتطلع النهار ده .. بس اهتم بنفسك..
حمدان : انشالله دكتور
الدكتور : مع السلامه .
الكل : الله يسلمك.

أم فلاح : الحمدلله ع سلامة ولدج يا ام غيث ..
أم غيث : الله يسلمج يا وخيتي ..
أم فلاح: يلا عيل سرينا نشوفه .
أم غيث : سرينا ..
حمدان : لحظه اميه بيي وياكم ..
أم فلاح : ارتاح يا وليدي عقب بتشوفه
حمدان : لا يا اميه بسير له .. خلاص ترى الدكتور رخصنيه .. ولي ما اييب ورقة الخروج .. بنسير صوب هادف..
أم فلاح: اللي تشوفه غناتي..
حمدان : تريوني شوي بس أرتب أموري ..
أم فلاح : خل كل شي عنك يا وليدي .. انت سير صوب الدكتور .. وانا برتب اغراضك لي ماترد ..
حمدان : خلاص يا اميه .. شورج وهداية الله ..
ام فلاح : الله وياك ..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
نقاش الحب
عاشق بلا حدود
عاشق بلا حدود
avatar

عدد المساهمات : 257
تاريخ التسجيل : 05/02/2011
mms

مُساهمةموضوع: رد: أرجوك لوتسمح تراك بدنيتي منفي   السبت فبراير 05, 2011 4:12 pm

موضوع حلو ومشوق يعطيك الف عافيه تقبل مرووري
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
أرجوك لوتسمح تراك بدنيتي منفي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
عاشق صبيا :: المنتديات الثقافية والادبية :: عذب القصـائد-
انتقل الى: