عاشق صبيا
عاشق صبيا
عاشق صبيا
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.



 
الرئيسيةأحدث الصورالتسجيلدخول
Cool Yellow 
Pointer Glitter

 

 ......القصائد.........

اذهب الى الأسفل 
كاتب الموضوعرسالة
ابوناصر
عضو ذهبي
عضو ذهبي
ابوناصر


عدد المساهمات : 157
تاريخ التسجيل : 05/01/2011
الموقع : احبك موووت

......القصائد.........  Empty
مُساهمةموضوع: ......القصائد.........    ......القصائد.........  Emptyالثلاثاء فبراير 08, 2011 4:08 pm

[
center]
يوم ثارت بي جنون من جنون الجاهليّة..
عاتبتني لين شبت في شراييني لهبها ..
أستفزتني و فزت وأزعلت منّي عليّه ..
وأستضاقت من كلامي يوم زعلني عتبها ..
من بعدها مابقى لي في محانيها بقيّه ..
أسدلت دمع المحاجر للبكاء و أرخت هدبها..
والله أني مانويت أبدي معاها بالخطيّه ..
بس هي اللي تعدت حدها لحظة غضبها ..
يمكن اني كنت قاسي بالعتب معها شويّه..
كثر ماكانت تمنى راحتي وأعشق تعبها ..
والله أني كنت أكابر بالعتب في حسن نيّه..
بس أبـ أدري هو صحيح أني الوحيد اللي عجبها..
جرحتني بالكلام وكبرت حيل القضيّه..
وأخسرت بي كل عرقٍ في شراييني كسبها..
وإلا هي ماكان فيها للموادع مقدريّه ..
والجفا كانت تعافه بس ماادري وش قلبها ..
ليتني ما رحت أقايس قيمتي عند بدويّه..
رجعت لي كل عرقٍ حبها وإلا نهبها ..
وعلمتني كيف بـ أنجح وأنتصر وأبقى ضحيّه..
وعلمتني كيف قلبي لو غلبها ما غلبها..
وعلمتني يوم صدت عنفوان الأجوديّه..
ماتلوح للمقفي لو سلبها ما سلبها ..
رابيه بين القبايل والعرب وأهل الحميّه..
عاقله ماتبذل إلا نخلةٍ تعرف رطبها ..
إن تهادت ذكرتني في خفوق العامريّه ..
وإن تمادت تركب إبليس الرجيم وماركبها..
جفنها لا سلهمت به مايطيق السامريّه..
تسحبه برضاه عينه وإن سهت عينه سحبها..
وإن حكت تعطي مكانه للحروف الأبجديّه..
كن كلمتها تلفت للكلام اللي عقبها..
والحروف إليا تعدت بالشفاه النرجسيّه ..
كنها صارت قصيده بس ربي ماكتبها ..
وش بـ اوصف من حلاها وش بـ اخلي للبريّه..
مابها بالحسن عيبٍ وأكشفت إلا حجبها..
شعرها فيه الخوي اللي تبرى من خويّه..
والشفه لو تشرب الماء وأختلط فيها شربها..
كن في ضمة شفاها جمرتين بـ نار حيّه ..
كل من حس بدافها وأحترق صد وقربها..
شفتها مثل الجريمه وابتليت بها بليّه ..
غلطةٍ جيت أتحاشى ظلمها قلت أرتكبها..
كل شي شفت فيها في نظرة جاذبيّه ..
موهبه من فضل ربي وأشهد ان الله وهبها..
كلها لله بالله فاتنة هل الآدميّه ..
عاحبتني من بداية راسها لأسفل كعبها ..
لو تبادلني شعوري والهديّه بالهديّه..
ما وفت لي لو تبيع ثيابها وأغلى ذهبها..
هملتني والقلوب الجرهديه جرهديّه..
وأحرمتني والمحبه نارها تاكل حطبها..
وإلا أنا ماكنت أكابر والليالي سرمديّه..
يمكن ان اللي غصبني للولع فيها غصبها..
ياخفوقي وأدري أنك منت في حاجة وصيّه..
شف مكاني وأنت تدري وين هي يمة عربها..
رح لها وأن كان فيها قلب يطمح في مجيّه..
شف طلبها في عروقه وإن حصل تمم طلبها..
وأنشده وأن قال عنها من هدر دمي بريّه..
قله أن اللي حصلي بالمحبه من سببها..
ولو يقول أني تعمدت الزعل لأجل الأذيّه..
قله أني ماأتحمل بالعتب طلة هدبها..
ولو يقول أني أنا اللي كنت بادي بالخطيّه..
قل هي اللي تعدت حدها لحظة غضبها..
..........................................
لو تعرف الخطايا كيف كنت محروم..
كان سود الليالي يوم طحت سمحت..
ولو هموم المفارق مثل كل الهموم ..
ماتشوفون عيني بالدموع سبحت..
ولو تحن المشاكل عقب حب الخشوم..
كان حبيت خشم المشكله و أستحت..
بين صدت عزيز وكبرياء مهزوم..
عين شحت علي وعينٍ أستسمحت..
بس ماالله خلقني من بكاي محروم..
وأدري أن المحاجر لو تفيض فضحت..
والله أني على جرحي صبور وكتوم..
لكن أن الدموع ان روحت روحت..
أعذلتني ظروفي وأنهكتني عزوم..
والوجيه حزنت لي والقلوب فرحت..
والله أن الليالي ماتعرف السلوم ..
قلبي جافي لقاه ووجه صافي بحت..
راهنت لي تبلل بالدموع الكموم..
ويشهد الله عليها راهنت وأربحت..
أحرمت نور عيني من غلا ريم قوم..
بذرةٍ وأرتوت لي وأثمرت وأطرحت..
جادلٍ دوم ماهي مثلها كل يوم ..
أستضاحت غموض وبالغموض وضحت..
دورت بين قلبي والهدب درب نوم ..
وأمرحت وين ماادري المهم أمرحت..
تنحت أسمي بقلبٍ جيت فيه معزوم..
وأسمها بين جلدي والعظام انحت..
مثل جفني لعيني بالنعاس محكوم..
كل مانمت نامت كل ماأصحى صحت..
ماتعارض كلامي غير عند اللزوم..
بس لا قمت أسولف وأندمج سرحت..
دايم أزعل عليها بس قلبي رحوم ..
وهي تموت بعذابي من تحت لـ تحت..
مثل وجه الصداقه في ثياب الخصوم..
ان تطيبت طابت وان جرحت..جرحت..
خصّها الله بوصف من خيال معزوم..
لا آذان أسمعت به ولا عيون لمحت..
كن ربي خلقها من بياض الغيوم..
ومن كفوف السعاده بالورود لقحت..
عن سواها فرقها بالقمر والنجوم..
وكل عذراء تمادى بالجمال نزحت..
بالحلى هي كوم وباقي الناس كوم..
كفةٍ عادلوها بالبشر وأرجحت..
حسبي الله على اللي مابغاها تدوم..
من بعد كيف كانت شوف كيف أصبحت..
لا تحقق وصال ولا فراق محتوم..
خطةٍ قربتني للفشل وأنجحت..
لعنة العشق تبقى مثل ضرب السهوم..
لو محى الوقت جرحه طعنته ماامحت..
كيف أبنسى وأنا اللي من جفاف لـ سموم..
ماحشمت العيون ولا الدموع فلحت..
كانها بالحميا كل ربعي قروم..
لو يلدون لصعاب الصروف صلحت..
أجزم أن كنت ياقلبي شجاع وجزوم..
لد لـ عيون لاألتفت لفحت..
ماتهين البخيل إلا يدين الخدوم..
دام كف الخطايا بالجفى لوحت..
نطّح الباس باس .. ونطّح اللوم لوم..
وان تهدت تهدّ .. وصيّح إن صيّحت..
ياتعيش بـ معزة .. ياتموت محشوم..
ودك أن الليالي لا فعلت مدحت..
عمر ضعف الإرادة مايسر الرخوم..
ضربت السيف لو بـ ايد الشجاع ذبحت..
----------------------------
أي بالله أخطوا والخطا اللي جابهم عين الصواب
مبطي وأنا أشوف الطمع يكشف زاااادهم وأستره
مايملى عيون الحسود بها الزمن غير الترااااب
ومن لا يتوب من الخطا تحرم عليه المعذره
اللي من أولها خراب أكيد تاليهاخرااااااب
والبندق اللي ماتثور في هدفها تذعره
ودّك ليامن جاتك الغلطه من الناس القرااااب
الصاحب اللي ماكسبت محبته ماتخسره
مشكلتي إني ماعرفت أحسب لصدتهم حسااااب
قلّطتهم صدري على ذكر القصيد وحنجره
صوت يوصل بمنبره وإخطاب مامثله خطاااااب
والطيبه اللي زعزعت صوت الخطيب ومنبره
مافيه دمعٍ صوبوه أحبابي بوجهي وخاااااب
ولا زرق حزني على غالي ولاااااا فج نحره
كل الزهاااااب اللي معي ذكرى من أصحاب الزهاب
واللي بقالي من عذاب أشرس طريقي وأخطره
لأني تجنبت الغرق00 عديت من فوق السحاااااب
لأن أكثر أصحابي ورق00مـاشفت للطيب ثمره
والله ماحطيت بين الحقد والخوه حجااااب
حتى غدوا ربعي يحدوني على الضيق أشكره
البارحه ثارت علي رقاااب وأوتني رقااااب
البارحه ياثقل دم الـبارح ويامحقـره
أثر المصاااايب ماتجيك إلا من الناس القرااااب
وبهالزمن حتى الخوي اللي تثق فيه أحذره
أهب ياوجه الحسد وشلون جمّعهم وغاااااب
كيف السنين اللي عطتني بعثرتهم بعثـره
لاااااباااارك الله في رفيقٍ تزعله كلمة عتااااب
ولا جمّع الله الرجال اللي تفرقهم مــره
الصاحب اللي مايجي من صحبته غير العذااااب
نذرٍ علي إن ما هجرني وإلا أنا اللي بهجـره
من يفتح لفرقاي باب أفك له عشرين بااااب
وإذا خويـّي مايقدر خوتـي ماقـدّره
عوّدت نفسي كل ماشددت لليمّه ركااااب
ما أصد وجهي عن طموح إلا ليا جبت خبره
أن روّحوا فأنا بريٍ منهم ليوم الحساااب
وإن جرحوا قولوا لهم ماااااحركوا في شعره
شفهم لهم حول السنه ولاخذوا مني جوااااب
أحسن دواااا للي يحاول يستفزك تحقره
ماكنت أحاتيهم صغير00 عاد أحاتيهم شبااااب
الصاحب اللي ما أذخره لليوم الأسود ما أذخره
شفني جمعت أوراااقهم بكتاب وأغلقت الكتاااااب
ياوقت لـم اللي تلمـّه وأنـثر اللي تنثـره
اللي يخاف من الظما يترك لناطرد السراااااب
واللي ماهو بـ قد الظلام ووحشته لا يسهره
عقب إكتئاب البارحه ماعاد أنا حمل إكتئاااب
الطيب جرجرني وأناماني بناقص جرجره
انا تجرعت الظما لين أحترق وجهي وذااااب
انا كسرت بخاطري قبل الصداااقه تكسره
انا خسرت اللي غيابه غير عن كل الغيااااب
انا غـفرت لعـالمٍ ماتسـتحق المغفـره
انا أكثر (إنسانٍ) تعلم من كثر ما أخطا وصااااب
انا أخر (لسان) يتكلم في زمان الثــرثــره
انا القصيد اللي فزع من دفتره مليون نااااب
وانا الوحيد اللي جمع مليون ناب بدفتره
جفني وجرّحه السهر ، حيلي وهدّته الصعااااب
دمعي هدر ، ضحكي ندر ، عمري وضيعت أكثره
شيبت بعقول العرب هيبت روسٍ ماتهاااب
جمهرت ناسٍ عمرهم مايعرفون الجمهره
ماصرت ذيب إلا لأن اللي تحدوني ذيااااب
ماكنت أغيب إلا لأن العفو عند المقدره
ترا حلاتك لا حملت لصاحبك كلمة عتااااب
أن ما نطقت بها بوجهه ماتذمه بظهره
في هالزمن مايملى عيون الحسود إلا الترااااب
والا الحظيظ00الطلقه اللي ماتصيبه تنـذره
ودّك اليا من جاتك الغلطه من الناس القراااب
الصاحب اللي ماكسـبت مـحبته لاااااتخسره
---------------------------------
قصيدتي زاد بعيوني جمالها .. وأخذت أنقي بالمعاني جزالها ..
وأكتب معانيها من الشوق والغلا .. لأمي وأنا أصغر شاعر من عيالها ..
كتبتها في غربتي يوم رحلتي .. لما طرالي بالسفر ماطرالها ..
أمي وأنا بوصف لها زود حبها .. وإن ماحكيت لها قصيدي حكى لها ..
أمي لها بالقلب والجوف منزله .. مكانةٍ ماكل محبوب نالها ..
أقرب من ظلالي وأنا وسط غربتي .. وأنا تراي أقرب لها من ظلالها ..
ماشافت عيوني من الناس غيرها .. ولا خلق رب الخلايق مثالها ..
أغلى بشر في جملة الناس كلهم .. وأكرم من ايدين المزون وهمالها ..
أتبع رضاها وأرتجي زود قربها .. والله طلبته من حياتي وصالها ..
الصدق والأشواق بحرها ..والعطف واحساس الغلا راس مالها ..
أهيم فيها وأبتسم يوم قلبها .. يسأل وأنا قلبي يجاوب سؤاله ..
وإن طلبتني شي فزيت مندفع .. اموت أنا وأحمل تعبها بدالها ..
أصبر على الدنيا والاحزان والتعب .. وأحمل على متني فطاحل جبالها ..
وأسهر وأعذب راحة القلب بالشقا.. وأعيش أعاني بس يرتاح بالها ..
تربيت أبوي اللي على الطيب بذكره .. اللي وهبني للحياة ومجالها ..
نور لي دروبي وأنا طفل مبتدي .. حتى تركني واحد من رجالها ..
الوالدين أولى بالأحسان لأجلهم .. وأولى بتكريم النفوس وعدالها ..
أقولها وأنا على الله متكل .. والله عليم بقدرتي وأحتمالها ..
ياكلمةٍ أغلى من الناس كلهم .. ياشمس بقلبي بعيد زوالها ..
يافرحة تملي لي الكون بأكمله .. ياشجرة تكبر ويكبر ظلالها ..
تضحك لي الدنيا ليا شفت زولها .. مثل السماء تزهى بطلة هلالها ..
والبعد عنها ياهل العرف مااقدره .. لا شك ناري زاديه بأشتعالها ..
مااعيش ببلاد ولا أهيم بأرضها .. ولا ابي عيوني دام ماهي بقبالها ..
أرض تدوس أمي بالقدام رملها .. أموت فيها وأندفن في رمالها ..
-------------------------------------------
جابك الله من غياب ٍ ضيّـق صـدور المبانـي
قبل لا الوحشه تزعزع بيتك الصلـب وتبيـده
بيتك اللي من رحلـت وكـل جدرانـه تعانـي
ماتحمـل ينتظـر شهريـن وعيونـك بعيـده
الله العالـم لـو إنـك جيـت متأخـر ثوانـي
ماتشوف إلا بقايا مـن حصـاه ومـن حديـده
من عرفتك وأنت تايه من مواني لـي موانـي
وتارك ٍ قلبي مولّع مـن وقيـده فـي وقيـده
ضاعـت سنينـي أحـد بهاليالـي وتحدانـي
وأنت ماتشبع غياب ولاتخـاف مـن النقيـده
_ودي أتحمـد لـك الله بالسلامـه , مامدانـي
كل ماتوصـل برحلـه ترجـع برحلـه جديـده
دام تدري كل وجـه ٍ غيـر وجـه الله فانـي
ياخي أكسبلك ثواب وخاف ربـك فـي عبيـده
كان فيني عيـب قلي:فينـي العيـب الفلانـي
كان هرجي مزعلـك فـي شـي قلي:لاتعيـده
عيب تصغر في عيوني وأنت برقاب الغوانـي
كيف تستسهل طعوني وأنت خابرنـي وليـده ؟
لعنبوك أن مت بيدك من يفكك مـن أخوانـي ؟
لحزنوا ربعي على فرقاي شاللـي تستفيـده ؟
أنت منت اللي عشقته أنت أكيد انسـان ثانـي
ليه صرت بهالبرود وبهالاحاسيـس البليـده ؟
وين حبك للزعـل .ويـن العنـاد الأولانـي ؟
وين حنّية زمـان وفرحـة العمـر الرغيـده ؟
وين ذاك اللي اليا أقبـل مايبـات إلا بمأنـي ؟
وين راح اللي اليا أقفى مايـروح ألا فقيـده ؟
واحد ٍ من جابـه الله بـس يامـر ويعصانـي
الوحيد اللي أخافه غصب وأمشي معـه سيـده
(مابغيت أطيـح بيـده) ليـن ماربـي بلانـي
ولا أنا لو هي بكيفي (مابغيـت أطيـح بيـده)
ذاك بس اللـي يامـن جيتـه يلخبـط كيانـي
اللي بنظـره ينشـف دم قلبـي فـي وريـده
قبل أشوفه أجمع اله أحلى القصايـد والمعانـي
وأن لقيته ماعرفت أقـول لـي جملـه مفيـده
الف مره قبلـه أعـد القصيـده مـن لسانـي
ولعنبوه أن جيت عنده قمت أخربط بالقصيـده
أمدحه وأنا أدري أنـه لـو تباطانـي نسانـي
أنطحه وانا أعرفه مجنـون وأفكـاره عنيـده
من يسوي بي سواتك يالرهيف الاسمرانـي ؟
منهو من الناس غيرك غلطته ترفع رصيـده ؟
من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبـي وواسـع بطانـي
ولا أنا لاجيـت أكيـد انسـان عـزالله بكيـده
أقدر أنزع لك ثيابـي وألبـس ثيـاب الأنانـي
وأقدر أطلع من عذابي والعب بدورك وأجيـده
ومستعد أكسب رهاني لو بغيت أكسب رهانـي
وأخدعك بحساس كاذب وأتحدى مـن يصيـده
أبك أنا لي شفت خلّي حط غيري فـي مكانـي
والله إني لتركه وأن صد لعشـق سيـد سيـده
جيت مابيك تحقرني جيت أبيـك تعـز شانـي
جيت أبي فزعة ظلوعك من مشاعرك البليـده
خلني داخل (حدودك) وأجبـر بخاطـر زمانـي
أكذب بباقي (وعودك) وأصدق بلحظـه سعيـده
أنتشلني من (بـرودك) لـو تولّـع بالمحانـي
عطني أحساس (بوجودك) وأخذ كل اللي تريـد
تكفى واليا قلت :تكفى بيع خلـق الله عشانـي
لاتضيّع من يدينـي فرصـة العمـر الوحيـده
يعلم الله شفت منـك ومـن غيابـك ماكفانـي
كان ماتقـدر تخفـف هـم قلبـي !! لاتزيـده
شف غيابك وش يسوي بالصـدور وبالمبانـي
وأنت تدري كيف كانت صدمت غيابك شديـده
والله أنك لو وصلـت البيـت متأخـر ثوانـي
مالقيت إلا بقايـا مـن حصـاه ومـن حديـده
-----------------------------------
مشكله لا جت حاجتك بيدين البخيل
ما يفكك لين تدفع كثر ما يدفعه
ومشكله لا صرت مطعون بكفوف الدخيل
في ظهرك أربع خناجر وبالصدر أربعه
ومشكله لاضاق بالوقت رجالٍ ثقيل
يطلب أحبابه وعيّا زمانه ينفعه
ليت ربي ما يحاسب خليلٍ من خليل
دام ما للحفظ فزعه وللوجه أقنعه
ودام ما للعذل تالي وما بالحيل حيل
الغلا سم نذوقه ومرٍ نجرعه
نحتري فيه اللقا والحصيل هو الحصيل
مثل حلم ماتحقق وعييت اقطعه
كني اللي حط بشفاه من جمر المليل
لا قدر يرميه للناس وازره يبلعه
والظرف اللي حدتني لنيران وفتيل
عرضت دمع المحاجر لشيٍٍٍٍٍٍٍٍٍ يجرعه
والمدامع بالغلا لا تحال ولا تحيل
والمشاكل كل ماجات جات مجمعه
اعذلوني عن هوى النفس وعيوني تخيل
في حبيبٍ ماتركته ولازلت اتبعه
مغرمٍ في حب مثله ولا ارضى له بديل
عيني تشوفه وقلبي يجوع ويشبعه
ذاك كل مازان بالي وطالعت النخيل
ماذكرت الا ثباته بوقت الزعزعه
ماهو الا قطعةٍ من حشى قلبٍ عليل
وماني الا قطعة منه مخلوقٍ معه
لا جميلٍ شفت قبله ولا بعده جميل
العذرى رهن رمشه وانا رهن اصبعه
والله انه لو طلبني طلوع المستحيل
لاطلعه منيه مناك يعني لطلعه
ماعلي من الملامه ولا هرج الهبيل
ماشجع الرجال لا ثار غيرة مشجعه
في عيون اللي عشقني ولا جاني هزيل
الله اللي حط عشقة بقلبي وازرعه
لو سكت ينطقله الصم والدنيا تسيل
وان حكى كن اكثر المزن ياقف يسمعه
سلسبيل في شفاته يخالط سلسبيل
معمعه بسكات واحلى سكات بمعمعه
ماهقيت ان اكثر الليل يمرح بالجديل
لين شفته شوف عيني بكفه يرفعه
وان حييت وما بقالي معه يا كود ليل
لا سهرة باول غروبه واموت بمطلعه
والله ان العشق جمره وطاحت بالشليل
وان حصل ما طاعك الوقت بأحبابك طعه
ومنهو اللي علم اعداي نكران الجميل؟
ومنهو أللي خان خلي وحاول يقنعه؟
كل عاذل ردني عنك يالطرف الكحيل
ياعسى الله يقلعه.. ياعسى الله يقلعه
يا معرض قلب الاحباب للدرب الطويل
السعه لا بارك الله بالضيق السعه
والله ان الوقت قاسي وأنا ماني ذليل
واشهد ان الرجل مرات ظنه يخدعه
انتم تعذلون خفاق بعيون العديل
ما رحمتم نار جرحه وغيرة مدمعه
والسوالف ليلها ليل والحايل يحيل
والمشاكل مشكله مشكله متجمعه
مشكله لا خانك الوقت بالحمل الثقيل
لو زرعت الزرع هوج العواصف يشلعه
ومشكله لا صار عاذلك ما يبرد غليل
لا ترده طيب كلمه ولا حدٍ يمنعه
ومشكله لا صرت مطعون بكفوف الدخيل
في الظهر أربع خناجر وبالصدر اربعه
-------------------------------
ماتقبلـت الفـراق مـا ليـدي فيـه حيـلـه
آه لو ان الظـروف المقبلـه تكشـف قدرهـا
لو يعرف الشخص منّا وش مع الغيب ابيجي له
كان جنبنا المشاكل من قبـل يوقـع ضررهـا
ما هقيت الليله اللـي جابـت الفرقـا طويلـه
لين صارت ليلة امس بعيني اطول من شهرهـا
والعذاب اللي يذوب بعيـن مـن يفقـد خليلـه
عندي اكبر من عذاب العين لو تفقـد نظرهـا
والحبيب اللي صـدوده مثـل مداتـه جزيلـه
صد عني واعرفه لو صد عن حاجـه هجرهـا
كن روحي يوم حست في جفاه وصعـب نيلـه
بشرتنـي بالضيـاع وشـدة العـزم لسفرهـا
ما رحمها مـن هـلاك ومـا تقبّلهـا دخيلـه
تحتضر قدام عينه ليـن ماتـت مـن قهرهـا
عاد ليت اللي ذبحها وارهب المـوت بوسيلـه
ما دفن وجـه الضحيـه والسكاكيـن بنحرهـا
ليت قلبه يـوم سـوى فعلتـه كمّـل جميلـه
لو غسلها من عروقه وبكفـن صـدره قبرهـا
من حفر بضلوع قلبـه حفـرةٍ تكفـي قتيلـه
ليه ما يدفن قتيلـه بالضلـوع اللـي حفرهـا؟
اشتكيتـه للرفـوف وللبـراويـز الهزيـلـه
وانذعرت من النياح اللي سمعته في صورهـا
رحت اسولف للجبال الصم عن قصـة رحيلـه
ما تركت متونها الا ينحـت الدمـع بصخرهـا
واحدٍ حقق جماله كذب اساطيـر الـف ليلـه
يسكن السبع البحور ويحبس الحـور بدررهـا
الـدروب بكبرياهـا ترتجـف تحتـه ذليـلـه
والورود اللي تقبّـل خطوتـه تنبـت بأثرهـا
والغصون اليا بغاهـا تنثنـي له.تنثنـي لـه
والفياض ان حب ينثر عطرها يلمـس زهرهـا
لو يصوّت للغديـر المنجـرف جفـف سبيلـه
وان تبسّم للجبـال الصامتـه نطّـق حجرهـا
كل حاجه تستوي له. لي بغاهـا تستـوي لـه
بالنظر واستغفر الله لو بقول : انـه سحرهـا
ذاك لو بـس يتمنـا فاكهـة شجـرة ضليلـه
بس يفتح راحت ايده ويتساقـط لـه ثمرهـا !
كن ربي سخـر لـه المعجـزات المستحيلـه
واصبح اسطوره وكل الالسنـه تنقـل خبرهـا
هان محجر دمع عيني ليـن جفّـف سلسبيلـه
والتفـت لأخيـر دمعـه قبّلـت يـده ونثرهـا
دمعةٍ كن بشقاها يـوم طاحـت فـي شليلـه
جادلٍ جـات بـدويٍ تطلـب الستـر وسترهـا
له علي انه ليا من طاح مـن عينـي تشيلـه
ولي عليـه انـه يرجّـع لابتساماتـي ثغرهـا
لو طعوني بالسكاكيـن بيـده تشفـي غليلـه
لاشتريها من عذابـي وادفـع بدمـي مهرهـا
واطلبه ينهال فيني طعـن ليـن يطيـح حيلـه
بس لا يترك عيونـي تنحـرم نعمـة بصرهـا
له بعيني مثل مـا للطهـر بالنفـس الاصيلـه
تقطع يدين الردا لو مس شعره مـن شعرهـا
مابغيتـه غيـر دربٍ شتّـت اقـدام الدليـلـه
مزنةٍ ما بللتنـي واستحيـت اطلـب مطرهـا
والعطايا مـن يديـن الخلـق للطالـب قليلـه
والوهايب مـن يـد الله للعبـاد اجـل وأرهـا
وان نسيت اني زرعت العشق وحظوظي بخيله
ما نسيت ان العطايا تستحـق اللـي شكرهـا
صعب تلقى شخص وافي يجزي الطيب بمثيلـه
والعرب كد قالت ان : الناس ما تترك قشرهـا
---------------------------------
عفا الله عن خطا غدر الخناجر والضلـوع ابطـال
بسامح واتركـك تحـت الظـلام الحالـك لحالـك
دخيلك وفر دموعـك تـرى هـدر الدمـوع اذلال
وترى ما فيه احد يصبر مثـل صبـري بغربالـك
انا عيب علـي أنقـض كلامـي والرجـال افعـال
واذا قلت اقطـع احبالـك ترانـي بقطـع حبالـك
عشان اكسب هدب عينك تجرعت العـذاب اشكـال
وليتـك تـرأف بحالـي علشـان ارأف بحـالـك
مسوي في حياتـي شـي مـا يذكـر ولا ينقـال
حشا حتى العدو وهو العـدو مـا يعمـل اعمالـك
تمسيني علـى الهـم وتصبحنـي علـى الغربـال
تقلطنـي فناجيلـك وتقـصـر عـنـي دلالــك
تحملت التعب لجلـك وانـا حملـي يهـد اجبـال
رحلت من العذاب ومـا وقفـت الا علـى جالـك
علامك كل ما جيـك متواضـع جيتنـي تختـال؟
معاك اليا متي بصبـر وصبـري معـك يحلالـك؟
مثل ما اقبلت لعيونـك لـزوم تلـد لـي باقبـال
ومثل ما قد حشمتك حس واحشم قلبي اشوى لـك
أنـا محـدن بجابرنـي أسايـر معـك هالمنـوال
ترى لانـي تبيـع لـك ولا نـي باصغـر عيالـك
أنا جيت اعشقك نبض ومشاعر ما اعشقك تمثـال
أنا جيت اسكنك واحياك وابقى فيـك وابقـى لـك
أنا جيت بظما عاشق تعـب يطـرد سـراب الـلال
أنا جيت استفز رضاك مـن فرقـاك والجـا لـك
أنا ما همت بك عاقل أنـا كنـت اعشقـك بخبـال
أنا ما كنت احبك حي أنـا كنـت اعشقـك هالـك
تخيل من كثر ما اخـاف تلقـى للزعـل مدخـال
أخاف اخطي على طيفـك وادوس برجلـي ظلالـك
تبعتـك والعـرب تتبـع رعـود البـارق الهمـال
وانا شفت المطـر يتبعـك فـي حلـك وترحالـك
كأن اللي خلق حسنك خلقني مـع جسـدك ظـلال
وصرت اقرب جسد يمشي معك باقفـاك واقبالـك
أبـي قلبـك يحـس انـه فقـد بمحبتـه رجـال
ملكته من هدب عين وخسـرت رضـاه باهمالـك
صحيح ان الفراق اقسى ولكـن الوصـال محـال
أنا صعبن علي أرضي غـرورك واضعـف قبالـك
بعـد مـا حققـت عينـي فبعـدك للرقـاد امـال
أعود للسهر؟ -- يا خـوي فـال الله ولا فالـك!
ببدل نظرتك فيني واجـي لـك كـل يـوم بحـال
بكون اقـرب مـن ثيابـك عليـك ولا تهيـا لـك
بالمك وانثرك واجمعك وارجـع وانثـرك باهمـال
بخونك وازعلك وارضيك وازعل منك وارضى لـك
أبرسم بالثرى وجهـك وابدفـن صورتـك برمـال
أبشكي للعـرب فرقـاك واضحـك عنـد عذالـك
أبهديك الوصال فـراق واهديـك الفـراق وصـال
بسوي مثل مـا شوفـك تسـوي وافعـل افعالـك
عشان تعرف من فينا الزعول ومن وسيـع البـال
أبيـك تـذوق فنجالـي وانـا بـذوق فنجـالـك
نصيحة واحتفظ فيها قصر معـك الزمـن أو طـال
أبي تسمع كلامـي زيـن وتحطـه علـى بالـك
اذا حبك هبال اطفـال لـك عنـدي هبـال اطفـال
ولا --- وابشر بعد بهبال حب مـا هـو بهبالـك
واذا قصدك تهين اسمي عشـان تشمـت العـذال
ترى لا انته ولا غيرك --- ولا عشرة من اشكالك
[/center] ابوناصر
الرجوع الى أعلى الصفحة اذهب الى الأسفل
 
......القصائد.........
الرجوع الى أعلى الصفحة 
صفحة 1 من اصل 1
 مواضيع مماثلة
-
» ...............القصائد...............

صلاحيات هذا المنتدى:لاتستطيع الرد على المواضيع في هذا المنتدى
عاشق صبيا :: المنتديات الثقافية والادبية :: عذب القصـائد-
انتقل الى: